الشيخ ياسر عدلي: المحافظة على الصلاة

س/ عاوز خطوات عملية أعملها عشان أقدر أنتظم في الصلاة؟
********
ج/ هديلك شوية خطوات هتفرق معاك بس لازم إنت اللي تاخد القرار بالتغيير:

1️⃣ غير وجهة نظرك عن الصلاة ماتتعاملش إنها حمل تقيل عاوز تخلص منه بالعكس الصلاة دي غذاء روحك اللي من غيره هتعيش تايه وقلقان فتعامل معاها إنها الوقت اللي بتطمن فيه روحك وبتديها الأمان اللي محتاجاه وتقويك كمان إنك تواجه مصايب الدنيا

2️⃣ اعرف خطورة ترك الصلاة أو تأخيرها وجمعها متخيل إنها آخر حاجة النبي وصى بيها واللي ربنا قالنا إن فيه وادي في جهنم مخصوص للي بيضيع الصلاة
“فَوَيْلٌ لِّلْمُصَلِّينَ الَّذِينَ هُمْ عَن صَلَاتِهِمْ سَاهُونَ”

3️⃣ حالا حالا انوي التوبة وتبدأ صلاة ع طول مش من بكرة ولا من أول الاسبوع حالا قوم صلي الفرض اللي ماصليتهوش

4️⃣ استعن بالله وادعي كتير اوي ان ربنا يثبتك ولو فاتك فرض الزم نفسك بصدقة تطلعها

5️⃣ كل شوية تفكر نفسك بأهمية الصلاة وتقوم نفسك بالغصب كده ماتنتظرهاش تقومك افضل اشحن قلبك دايما بحاجات تخليك تثبت فيديوهات قصيرة مثلا

6️⃣ نزل برنامج آذان ومواقيت الصلاة على تليفونك واظبطه يفكرك قبل الآذان ووقته ومع الاقامة خليه كل شوية يقولك قوم صلي

7️⃣ 👈لو شباب انزل مسجد واستعين بصحبة يسألوا عليك لما تغيب وتشجعوا بعض على الصلاة ..الصلاة في المسجد هتخليك ماتبطلش تاني
👈 لو بنات يبقى ضروري أول ماالأذان يأذن قومي جري صلي كل مازادت المدة بين الأذان وإنك تقومي تصلي كل ما زاد فرصة إنك تكسلي

8️⃣ الصبر والاستمرارية وماتزهقش كل عادة عشان تبنيها بتاخد وقت بس لازم تبذل جهد وتتعب وتخرج من منطقة الراحة لإن مافيش يوم نفسك هتقولك قوم صلي ..لازم انت اللي تقومها لحد ماتتعود

9️⃣ ما تربطش بين الصلاة والرزق في الدنيا عشان ماتسيبش الصلاة لو جبت درجة وحشة ولا حصلك أي أزمة قول لنفسك أنا كده كده هصلي (زهقان ، متضايق ، تعبان) برضو هصلي، إن شاء الله.
……

اللهم وفقنا للصلاة في أول وقتها.
اللهم آمين يارب العالمين.

الشيخ ياسر عدلى