قدم مصطفى عادل الخبير الاقتصادي 17 نصيحة للعمل في مجال ريادة الأعمال وهى كالتالى :
١- اللي بتفكر فيه عن نفسك وعن شغلك هو اللي بيظهر في نجاحك أو فشلك.
٢- لو كنت عشوائي ومش محدد هدفك، شغلك هيبقى كده عشوائى
٣- مش كل واحد بيشتغل حر هو رائد أعمال لأن رائد الأعمال هو الذى يخاطر ويتحمل المكسب و الخسائر، لأن لا يوجد مكسب طول الوقت، لكنه مش بيكتفي بالربح العادي.
٤- مش كفاية تكون شاطر في شغلك، لازم تكون شاطر في إدارة شغلك يعني لو كنت بتاع كفتة مثلاً مش كفاية تعمل أحلى كفتة في الكوكب ، لازم تدير محل الكفتة بتاعك بطريقة نظامية ومنظمة.
٥ – لو عاوز تبقى ناجح في شغلك، لازم تبني نظام شغل يعتمد على قواعد وإجراءات واضحة، مش على مزاجك أو حالتك لأن النظام ده هو اللي هيخلي شغلك يستمر ويتطور، مش مجهودك لوحدك اللي هينجح الشغل.
٦- لازم تفكر في المستقبل، وبلاش تكون منهمك في الحاضر طول الوقت ولازم تخطط لشغلك من الأول، وتحدد رؤية وهدف وإستراتيجية لشغلك وبلاش تشتغل بطريقة هو الكلام على ايه النهارده؟!
٧- لازم تفهم إن فيه ثلاث شخصيات مختلفة في داخلك : المتخصص والمدير والرائد.
المتخصص هو اللي بيعرف يعمل الشغل بإتقان، المدير هو اللي بيدير الشغل بفعالية، والرائد هو اللي بيلاقي فرص جديدة وبيخلق أفكار مبتكرة.
لازم تجمع بين الثلاثة في شغلك، ومتهملش ولا واحدة منهم.
٨- لازم تفهم إن شغلك ده عبارة عن نظام كامل، مش حاجات منفصلة وكل جزء في شغلك ليه علاقة بالجزء التاني، وكلهم بيتأثروا ببعض فلازم تشوف شغلك من منظور كبير، مش مركز طول الوقت على التفاصيل الصغيرة وبس.
٩- لازم تفهم إن شغلك ده مش بتاعك انت، ده بتاع الزبون والزبون هو اللي هيقرر وهيوجه البوصلة عشان مصلحة العميل هي الأهم.
١٠- لازم تتعلم تفرق بين الشغل والحياة ومش كل وقتك تبقى شغال، لازم تخصص وقت لنفسك ولأهلك ولأصحابك لأن الشغل مش كل حاجة في الدنيا، ولازم تستمتع بحياتك برضو.
١١- لازم تتعامل مع الناس بإحترام وأخلاق سواء زبون أو مورد أو موظف، لازم تعاملهم كبشر والناس دي هي اللي هتساعدك في شغلك، وهتدعيلك بالخير، وهتنشر سمعتك الحلوة.
١٢- لازم تستغل كل فرصة تقابل فيها ناس جداد لأن الناس دي ممكن تفيدك بأفكار أو نصائح أو خبرات أو علاقات.
متخافش تسأل أو تتكلم أو تشارك في المؤتمرات والورش والندوات لأن ده هيزود من قيمتك وثقتك.
١٣- لازم تبقى مستعد للتغيير لأن السوق والزبائن والمنافسين بيتغيروا طول الوقت، ولازم تتأقلم مع التغيير ده.
متبقاش عنيد أو متعصب لفكرة معينة، لازم تجرب حاجات جديدة وتطور شغلك باستمرار.
١٤ – لازم تبقى صادق مع نفسك ومع الناس ومتخدعش نفسك بأرقام كبيرة أو حجات غير حقيقية، لأن ده هيضر شغلك في المستقبل وكمان متخدعش الناس بإعلانات كذابة أو خدمات سيئة، ده هيخسرك ثقة الزبائن فيك.
١٥ – لازم تبقى قادر على اتخاذ القرارات المهمة في الوقت المناسب ومش كل قرار لازم يكون سهل أو صح، بس لازم تثق في حسك وفي خبرتك ومتخافش من المخاطرة أو من الفشل، ده جزء من شغلك.
١٦- لازم تبقى قادر على التعامل مع المشاكل والصعاب بذكاء وإيجابية ومش كل مشكلة تبقى نهاية الدنيا، بس لازم تلاقي حلول عملية وسريعة ومتستسلمش أو تحبط، لأن ده هيضعف من عزيمتك.
١٧ – لازم تبقى قادر على التعلم من أخطائك ومن تجارب الناس التانية ومتكررش نفس الغلط مرتين، بس اعتبره درس مفيد، وكمان اقرأ واسمع وشوف قصص النجاح والفشل لرواد الأعمال التانيين، لأن ده هيفيدك كتير جداً.
